Ziaktu:Scarlet Wilson/Ye Fei Ye

Letlingtu: B.Hlutei

A hmeichhe hriat theihna in Alex a'n a lo thlir reng tih a hria a, blanket chuan a inkhuh ṭha sauh sauh a, lukham ah chuan a hmai a phum a, a lo huh hluam mai tih a hriat chuan a hma lawka a mang vanga a ṭah kha a hrechhuak a

Isabelle chuan Alex a'n a chungah eng pawh thleng se engah mah a ngai dawn lo tih a hria a, mahse a ṭah nasat zia chu hriattir a duh bik chiah lo. A lukham chu ngawi rengin a pawt hnai sauh a

A chet dan chu nasa vak lo mahse Alex a'n a lo hmu hman tho a, a hlatah awm a tum niin a ngai a

Alex chuan Isabelle chu rei fe a thlek hnuah room chu a chhuahsan a

Kawngka a khar chiah Isabelle chu a meng kuau a, lukham chu dah sawn in a mu ṭha leh a

Minute nga hnuah bedroom kawngka chu a rawn inhawng leh a, Alex chu lehkha chhah deuh kengin a rawn lut a, khum bulah chuan kal zai zaiin Isabelle chu a melh zawk a, dawhkanah chuan lehkha chu nghatin Isabelle piah ah chuan a ṭhu a

Lehkha chu thliin a chhem a, Isabelle hmaiah a fuh a, a men rual chuan a mithmul sei tak chu a khur deuh det a, Alex chuan a kut zungṭang sei takin a mawng tawp ding lam box a lehkha inziak chu a kawk a, rum zet hian "Sign rawh" a ti a, inthlakna room ah a lut nghal a

Inthlakna room kawngka a khar hnu chuan Isabelle chuan lehkha chu a han bih chiang deuh a, a hmuh rualin a mitko a chuar tap a

Costemic te nena thawh hona tur Contract a lo ni

An brand pawh an ṭha sang fal nalh a, khawvel pum huap pawhin an model lakluh te chu foreign chauh an ni ṭhin

Alex a'n lehkha sign turin a duh maw? Chumi awmzia chu fakna ah a lang ve tawh dawn tihna a ni thei ang em?

A awih lo lutuk chu Isabelle chuan mumang ni maiin a hria a

Alex chu inthlakna room aṭang chuan thawmhnaw thianghlim deuh ha in a rawn chhuak a, nghawng awrh chu kengin darthlalang hmaah a ding a, darthlalang aṭang chuan Isabelle a rawn melh a, nelawm lutuk lo hian "I sign tawh em?" A ti a

Isabelle chu a tawn dak chhuak a, a lu a thing a, a huaisenna sawm khawmin Alex chu a en a, a thu hriat chu a la awih thei ngang lo

"Fakna ti turin min duh tihna em ni?"

Alex chuan "Aw" a lo ti liam ve mai a

Fakna a ti ve tak tak dawn tih a hriat chuan a hlim nghal viau mai. Mahse rinhlelhna chuan a rawn tuam nghal thuai a

Engati nge a engah mah hmain fakna a lo hmuh sak ngawt ang le?

Alex chuan thiam takin a nghawng awrh chu a han suih a, Isabelle lam a rawn hawi chuan a hmel a dik leh tawh lo, a lo la sign lo tih a hmuh chuan chang fak hian "Tinge i sign loh va? Cosmetic fakna a lan chu i chak vak lo em ni?" A ti 

Alex a aw a hriat chuan Isabelle chu a inthing harh vat a, pen chu a ban a, a sign hma chuan a rinhlelhna chu kian tir phawt a duh a ni

"Tinge fakna min hmuh sak a?"

"I phu alawm" Alex a'n a ti leh hmuk a

'A phu maw?' Isabelle chuan a phu na awm a hre miah lo

Alex chuan a rawn melh vung vung a, minute nga hnuah thu kha zet mai a rawn chhak chhuak a "Nizana i lawmman a nih kha" a ti a

'Nizana a lawmman maw?'... A nih chuan a taksa a hman vanga a lawmman hmuh tihna a nih chu!

Isabelle chu second nga Alex a thusawi ngaihtuahin a chawl det a, pen chu nghet zetin a hum a, a hlimna pawh a bo chawpchilh leh duak a

Contract chu a melh ngawt ngawt a, chutih lai tak chuan hmuhsitna nasa tak niin a ngai a ni

Isabelle hreh hmel lutuk a han hmuh chuan Alex chu a mitko a chuar tap a, a nelawm loh sa nen misualpa hi a ang ber tawh zawk mah a, aw chang fak hian 

"Eng nge? Fakna chu a tawk i ti lo deuh em ni?" A ti a

Alex a aw a hriat chuan Isabelle chuan kut khur deuh dar dar hian ngawi rengin a hming a sign a

Lungngaihna chirhdup ah a tang tlat tawh a ni. Alex khuma a lawn aṭang khan hmuhsitna tinreng tawk turin a insiam ta a ni. Khatih lai khan 'To the End of Time' movie ah chan a duh thu sawi lo se ṭha tur tih te a ngaihtuah neuh neuh a

Contract sign loh chu a duh viau a, mahse ama buaina insiam a ni a, chhuanlam tur a nei meuh lo

Kum sawmpathum liam ta ah khan a hmangaih a, mahse a la naupang in a zakzum em a, a hmangaih thu pawh a hrilh ngam lo a ni

Tun thleng pawhin a la hmangaih reng a, a hmangaih em avang chuan inthup harsa a ti hle ṭhin

An inkar chu lei leh van ang vel a ni. Hnai em em tho mahse a hmangaih tih a hre si lo. A hmaah ding ṭhin mahse a hmangaih thu a hrilh ngam tlat si lo a ni 

Isabelle mittui tling nasa lutuk chuan a khaw hmuh a tifiah lo vek. Hnuai lam melhin a mittui tlak tir loh hram a tum a, a pen chuan a han thai leh zeuh a, contract a sign zawh chuan dawhkanah pen chu nghatin lehkha chu Alex a pe a

Isabelle che buai miah lo a hmuh chuan Alex chu a thinur leh tlat a, puakkeh tur meialh hlawm ang mai hian a chhungril chu a tawt up up a

Chuveleh Alex chuan khuma savawm lem chu a melh run a, Isabelle chu hriam hrakin a sawi ṭhaih leh a "Costemic brand ni lo thil dang i hmang tur a ni lo, chuti lo chu pawisa tam tham tak i chawi ang

"Kan hrilh chiang leh law law ang che. Contract a inziak hi i bawhchhia a nih chuan jail tang thei reng i ni. Global Entertainment hian cheng khat mahin an ṭanpui dawn lo che ania!" A ti a

Alex a'n a sawi zawh chuan Isabelle kuta contract chu na zetin a pawt hlawk a, rum zeta rawn melh in a inher vut a

Alex a liam chiah vang nge a hritlan vang pawh a inhrethiam lo, mahse Isabelle chu a hah lutuk ringawt. Mut pawh a sual nasa ngei mai

Savawm lem lian pui amah aia sei chu a kuah hlun a, ceiling chu a melh tlawk tlawk bawk. Kum khat leh a chanve lama thil thleng kha a la hre ruai ruai a, Alex nen an inneih a ngai tih an hrilh lai kha...

James a birthday an han hnu aṭang khan a hmu leh lo char char a, chumi ni chuan Alex a rawn luh rualin a sir kil aṭang chuan a lo en reng a

Khatih lai khan an innei ang tih reng a ring pha lo, mi hrang daih ve ve an ni reng turah a lo ngai a ni

Mahse van lam hian tum dan dang a lo nei a ni. Alex leh Isabelle chu an inhnimhnai leh tawh ngai lo va, mahse an intawng leh tlat si a ni

Chu pawh James vang a ni

James hi William Enterprise roluahtu tur a ni a, thawnthu a lal fapa ngainatawm tak ang mai hi a ni

Mahse Lal fapa pawh chuan a tana ruat a pumpelh thei bik lo. Thla sarih liam taah khan car in a accident a

Chumi zan chuan James a'n Bugatti Veyron a khalh a, leihlawn a zawh lai takin a chesual a, car aṭanga an lak chhuah meuh chuan a thaw ṭek ṭek a

William Enterprise roluahtu tur James nunna chu a lo tawp der mai. A nihna leh accident a tawh chu khawvel pumin a lar vat a, mite sawi ber a ni lo thei lo a ni

Enterprise angah hi chuan roluahtu dinhmun hi a pawimawh lutuk a, James-a accident tawh chuan William Enterprise share a pawt thla duai a, an engkim an chan lo chauh tawh a ni

Chutiang thil thlep chu thup tumin William Enterprise te'n mipui hnenah James chu thi lo angin an chhuah a

James chu a thi lo reng a, nikhaw hre lo leh che thei lo vin a awm reng tho a, danglamna vak a awm lo. Doctor te chuan harh chhuahna chance a nei niin an sawi a, mahse a hun tak erawh an sawi chiang thei lo

Mipuite chuan amah tak an la hmuh bik loh avangin Enterprise lam tan pawh tih dan ngaihtuah vat an ngai a ni

A tawpah phei chuan William Enterprise chhungkua te chuan James anga lem chang tur mi an zawng tawp mai a, sumdawnna tlakchhiat an duh loh chuan a ngai ve tlat si a ni

Chu mawhphurhna chu Alex chungah a lo tla ta a, inzawmna pawh an nei lem lo a ni

A chhan pawh a ho angreng. Alex leh James chuan pa hmun an neih avangin phir ni chiah lo mahse an inang ve em bawk a ni

An thiltih chu thupin Enterprise te chuan mipui hnenah James chu accident naah a hmai a sawh chhe nasa lutuk tiin an hrilh a, Alexander chu hmai khem nuaiin mipui hmaah a rawn ding a

Chung te avang chuan mipui pawhin an ring ve leh mai a, William Enterprise te chuan ngai an rawn awh leh a

Chutih lai chuan Isabelle pawhin James chu a harh chhuak ah a ngai a, damdawiinah hlim zetin a kal a, a ṭhianpa a kawmngeih em em chu lawmpuina hlanin mittui tling pam in a kuah a

A hnua James-a nu nen an inbiak aṭang a kuah mi kha Alex zawk a lo ni tih a hre leh hnuhnawh a

Williams chhungkua leh Davis chhungkua te hian thawhhona ṭha tak an nei a, Pi Williams, James-a nu pawhin Isabelle hi a duat hle a, an thil tawn chu tlaiah Isabelle chu mittui nen a hrilh malh malh a

Board member tam zawk te chuan investment lak let an duh thu leh inneih chauh chu a kawng awmchhun nia an ngaih thu te a hrilh a, mahse mipuite hnenah James chuan a hmai a sawhchhia an tih avangin nei duh tu tur a hmu tawh lo tih te a sawi leh a, Isabelle hnenah puihna a dil a, James a lema chang Alexander nen innei tura a duh thu te a sawi a

Isabelle chu a thu hriat chuan a ṭhawng lutuk a, a chhang thei lawk lo. Pi William hnenah a lo inngaihtuah tur thu a hrilh a

Pi William chuan harsatna siam sak a tum lem lo, mahse Isabelle chuan thuruk a thup pui theih a beisei tlat a, Davis chhungkua tu hnenah mah sawi lo turin a ngen a

Isabelle chuan thil awmzia chu hrethiam in engmah a sawi chhuah loh tur thuin a tiam a

A haw hnuah ngawi rengin a inngaihtuah a, van lam hian thilpek a rawn pe ah a ngai a, Alex nen hmelhriat loh ang maiin an awm tawh lo turah a ngai a

Isabelle hian Alex-a nupui nih hi a duh ber a ni ṭhin a, mahse beiseina beidawnthlak mai a ni leh ang tih a hlau ber. Tunah chuan a nupui nih theihna hun ṭha a nei leh ta a ni

Amaherawhchu, a pu hnenah chiah James a nei dawn tih a hrilh thei a ni

Chu pawh chu ni mahse Alex a hnaih theihna tur a nih avangin hun ṭha chu bawhpelh a duh bik lo. Hmelhriat loh anga awm reng leh inbiak ngai loh ai chuan a thlang fe zawk

Rei tak a inngaihtuah hnuah Pi William hnenah a pawm thu hrilhin a call a, mahse board member leh sumdawnna lama an thawhpui te tih loh chuan James nen an inneih chu an hre tur a ni lo tiin ngenna a siam a

Pi William chuan a lo remti nghal vat a, bakah mipuite pawhin James chu a inhliam nasa niin an ngai vek a, William chhungkaw tan pawh inneihna ropui taka siam kha chu miten sawi zui a hlawh hat ang tih an hlau a ni

Isabelle leh Alexander chu an innei ta der mai. Inneih certificate pawh an nei lem lo

Amaherawhchu, inneihna lian vak lo chu an buatsaih ta tho va, sumdawnna lama an thawhpui te leh Williams chhungkua te chauh an tel a ni

An inneih zanah Alex buaina siam sak lo turin a intiam a, an nun a khawih buai lo vang a, mipui pawhin an inkar an hre lo vang tiin a hrilh a

Nupa tak tak an nih loh avangin nupa nun an hman tak tak a ngai lo ang tih te a sawi a

Chutiang chu sawi mahse a thinlung tak tak ah erawh a ti tak tak lem lo

A sawi zawh chuan Alex a'n rei zet a lo melh run hnuah bung deuh hmuk hian "I thusawi chu i hriat reng ka beisei" tiin bathroom ah a luhsan a

James chu a la harh theih loh reng avangin Alex a'n a din sak reng theih loh chin a awm dawnin an hria a, James mipui hmaa a inlan loh chuan a nupui pawh a lan a ngai lo vang. Hmun hran daih ah an awm in a chang chauhvin an inhmu thei tho mai

Davis chhungkua te hian thudik engmah an hre lo. A patea te hnen aṭang a indang tawh bawk si a, Williams mansion a chen chu a zuam lova, in luah tur a zawn dawn lahin an rinhlelh a hlau bawk si. Alex a'n York Garden a a chenna ah awmtîr ve a lo phal hlauh a

Alex leh James te hian York Garden a Mansion hi an lei ve ve a, an inṭhenawm a ni. Isabelle an hmuh pawhin James a inah lutah an ngai mai zel a, Alex pawh James angin a awm ve mai bawk ṭhin

Amaherawhchu, buaina liam tham ni chiah lo, Isabelle ti phur a, a ngaihtuahna ti mang tu a awm veleh a, Alex mansion ah hian khum pakhat chiah a awm a, room dang te chu a ruak vek a, eng vak mah a dah lo. Alex rawn let apiangin khum chu an inṭawm mai zel a ni

Isabelle chuan rei tak an hun kal tawh vel a ngaihtuah hnuah a lo muhil leh daih a, engmah a hre leh tawh lo. A tukah chuan inhnuai lama thawm rawn chhuak chuan a tiharh a

~*~

Isabelle chu a meng zau kawk a, mipa leh hmeichhia inbe thawm chu a hria a, hmanhmawh deuhin blanket chu a tlawh leng a, a jacket chu banin inhnuai lamah a chhuk a, khum an lo dah belh a lo ni. Madam Mary chuan floor khatna room ah dah turin a lo hrilh a

Madam Mary chu Alexander a rawih a ni a, Alex hian a inah mi dang a luh tîr zen zen lo va, zingah in a rawn tifai ṭhîn

Mi hausa te khawvel a hriatthiam ve loh avangin Isabelle leh Alex an inneih khan "Mrs Smith" tiin a ko mai a

Isabelle a hmuh veleh Madam Mary chu a nui sen sen a "Mrs Smith, i lo tho tawh a ni maw?" a ti a

"Eng nge in tih a?"

Isabelle chuan khum an zawn luh chu a en reng 

"Mr Smith a'n a lo chah a, in pahnih hian film changa in zin bo a ngaih ṭhin avangin in lo enkawl turin min ti a" a hrilhfiah zawh chuan choka lam a kawk a "Mrs Smith, tukṭhuan ka peih tawh a, i intihfai zawh chuan rawn ei nghal mai ta che" a ti a

Isabelle hi Alex a mansion ah hian kum chanve dawn chu a awm ve ta a, thla thum chhung 'To the End of Times' changin a chhuak a 

York Garden a let lehna hun pawh a nei lo va, thla thum chhung in chu a ruak a, Alex hian tu te mah enkawltîr a duh lova, tinge tun a takah Madam Mary chu cheng tura a lak luh ang le?

Isabelle rilru chu a buai leh map mai. Alex hi a hrethiam thei ngai dawna a hriat loh avangin a ngaihtuah thui duh lem lo

Madam Mary rawn insuan luh hnu chuan fridge chu a ruak leh tawh ngai lo. Englai pawhin thlai thar, thei leh sa te a awm reng zel tawh a ni

Madam Mary chuan in a tifai hnehsawh in eitur siam a thiam em em bawk a, Isabelle ṭawng dan aṭang a hritlang tih a hre nghal a, herbal soup a siam sak a, Isabelle pawh a dam chakin film chang turin a inpeih thei dawn der mai

A hritlan avang khan ni hnih tal tawp a tho chhuak lo kha a ni a, tunah chuan a dam ṭha tawhin a ni vah mai. Ṭukṭhuan a ei lai chuan khua a thiang ṭha hle tih a hria a, vah khaw thawn a tum ta a

Favang a la inṭan lo deuh a, ni pawh a la sa lutuk lo. Madam Mary chu Isabelle i'n engmah a keng lo tih a hmuh chuan nihliap a rawn pe a "Mrs Smith, ni hi a sa si a, hei hi khum rawh" a ti a

Madam Mary chu Mansion ah let leh in choka a tifai a, chhuat a nawh zawhin kawngka inhawng ri a hria a, a lu kân miah lo vin "Mrs Smith, i va lo let leh hma ve!" a ti a

Alex chu a nur deuh hlek a, kawngka ah pheikhawk a phelh a, aw tliang ralh in "Khawiah nge Mrs Smith chu a kal?" a ti a

Madam Mary chuan Alex a aw a hriatin a phu deuh zawk a, a lam hawiin chibai a buk a "Mrs Smith chu huanah a kal a" a ti a

Alex chuan a chhang tawh lem lo. Car chabi chu chhuara dahin inchung lam a pan a

Elevator lam a pan laiin Madam Mary chuan a inngaihtuah deuh hnuin a bia a "Mr Smith, Mrs Smith chu ka lo koh sak dawn che em ni?" a ti a

Alex chuan chawl detin "A ngai lo vang" a ti bul hmuk a

Elevator ah chuangin inchung lamah a chho tlang a

Study room ah document la in a lo chhuk leh a

Madam Mary chuan Elevator aṭanga a rawn chhuak a hmuh chuan eng nge a tih dawn a lo zawt a "Mr Smith, chhuah leh mai i tum em ni?" a ti a

Alexander chuan lu a lo bu nghut a, chhuara a pheikhawk chu a la leh a, chabi chu banin Madam Mary, vase tifai mek chu a rawn en a, chawl deuh detin "Mrs Smith-i hriselna tunlai a ṭha em?" a ti a

Madam Mary chuan thudik takin a chhang a, "Mrs Smith chu nimin khan a dam chiang tawh e, buaina a nei tawh lo vang..."

Madam Mary'n a sawi zawh hma chuan Alexander chu car chabi la in pawnah a chhuak daih

A chet dan aṭang chuan Madam Mary'n Isabelle dinhmun hrilh lui a ang zawk alawm le

Alexander chuan car kawngka hawngin a chhungah a ṭhu lut a, darthlalang aṭang Isabelle a hmu a, nihliap khumin pangpar a lo a, Alexander chu engin a chhun avângin a brake a rap tuarh a, a ding dawt a

Isabelle chu rei tak a thlek vang vang hnuin cigarette a han ṭan a, a la thlir chhunzawm reng a

Cigarette chuan a mawng a thlenin a kut a kang lek lek tih ah a harhchhuak zawt a, astray ah a nawr hlum a, darthlalang chu a awmna lamah lamah a han her a, a hmui tep chap in a hawisawn thei hram a, steering wheel vuanin a inkhalh chhuak ta a

Isabelle chuan bouquet khat pangpar a lawh zawh chuan inah hlim takin a hawn a, Madam Mary hnênah vase ruak a dil a, a hnah thlawnin zanriah kilna dawhkanah a khawi a

Isabelle chuan a kut a sil a, Madam Mary chuan hriatchhuah thut nei ang mai hian "Mrs Smith, Mr Smith a'n tun maiah khan document a rawn la a" a ti a

Isabelle chuan ngawi renga a lu kunin a kil a sil leh malh malh a, a mood a fuh ve hman tawh nen a hnual leh nghal rawih mai

~*~

Alexander a haw thut vâng khan ni lai laiin filming an sawn a, an let leh veleh Alexander leh Isabelle chuan scene an nei dun nghal a

Filming an tih ni hmasa berah chuan khua a ṭha em em a, an chan tum ni hmasa zawk ang chiah tho kha a ni. Crew te pawh hma takah an kim ṭhap a

Isabelle an chei zawh chuan Alexander a'n film channa tur hmunah a lo nghak reng tawh. A ngai te bawkin metre hnih vela hlaah an lo awm ṭhap a, tumahin an hnaih ngam lo. Hmeichhe ho erawh chuan an duh loh phah chuang lo reng reng

Director in Isabelle a hmuh veleh Alexander chu a bikin a hrilh a, an awmna tur hmunah an awm nghal ṭhap a

Script ah chuan second female lead leh second male lead hi an naupan lai aṭanga ṭhian ṭha tak an ni a, mipa chuan hmeichhia chu unau angin a en a, mahse hmeichhia chuan a rukin a lo duh reng a, mipa in a hmangaih tak a neih dawnah hmeichhia chu a insumthei ta lo va, tihnat phawt a, an pahnih inkara tlakzeh a tum dawn a ni

Chuan vawiina an chan tur hi chu Mipa kha a hmeichhe hmangaih deuhvin ram dangah a kalsan dawn laia hmeichhia in a lo hnem lai kha a ni

Director in "Ṭan ru le" a tih veleh camera chuan Alexander chu an tin nghal ṭhap a

In mawi taka cheiah Alexander chu a kawr chuar tak nen chhuatah a ṭhu sawp nuaih a, beer bottle ruak tam takin a hual ṭhup a, a kut lehlam in beer pakhat a keng a, lungngaihna nasa tak nei hmel a pu a 

A takah nelawm lo viau mahse lemchan chu a hnehsawh khawp mai. Eng role pawh nise a tak ang maiin a chang chhuak thiam a, a nelawm lohna te kha a bo vek a, mipa thinlung kehchhe vek ang mai a ni leh tawh. Beer chu lem khawlh in, nasa lutuk in a khuh a, a mittui rawn tling in a biangah a luang a

"Alexander hi chu film chan kher kher hi chu a thiam a ni. Scene khat lekah pawh a theihna a lang nghal der ania"

"Lalpa le, a khuh leh ṭap lai te pawh kha a tak a va ang tak"

An vaiin Alexander chu lem chan thiam an tih em avangin an fak chiam hlawm a

Annabelle pawh a hriat miah loh vin Isabelle bulah a lo ding a, nui sen sen in "Miss Davis, Mr Smith a lemchan thiamna hi i phak meuh ang em tih ka ngaihtuah a" a ti a

Actor thiam deuh te bula lemchan chu a nghawng a na viau ang tih a rin theih. An chan pui te an thiam loh viau phei chuan actor thiam tak te pawh an khaihlak phah vek thei tlat

Annabelle rawn kal chhan diktak pawh Isabelle i'n he role hi a hnehsawh viau ang em? tih hmuh a duh vang a ni. Alexander a'n thiam takin a scene a zo tawh a, Isabelle vanduaina a ni ang em? Mi thar mai a la ni a, experience a neih loh bakah a chanpui pa thiamna hi a phak kher lo maithei tih ngaihdan te a lo nei a

Isabelle zak taka a awm lai hmuh a duh ngei mai. Ngawi renga a ding reng lai chu "I scene chan tur kan nghakhlel tlang khawp mai" a ti a

A sawi zawh chuan Annabelle chu a hawi kual a, a thusawi chu pawmpui tih hriat takin lu an lo bu tliar tliar hlawm a

Isabelle pawhin Annabelle sawi tum dik tak chu a man thiam mai. Zak taka a awm lai hmuh a duh tih a hrethiam nghal vek

Engmah sawi zui lo vin dam dapin Isabelle chu a ding reng a, Director in a signal veleh midang daih ang mai a ni nghal a, Alexander a awmna room ah rilru chiai takin a tlan lut a

A lo awmdan a hmuh chuan second male lead hming khân a au va, a bulah tlan in a ṭhingṭhi hnawk a, a bottle ken lai chu a chhuhsak a

Hetih lai tak hi chuan Alexander chu a rui tawh khawp mai. Isabelle chuan sofa ah thei leh thei lo vin a muttîr a, dawhkana towel huh chu la in Alexander a hmai chu a hru a

Isabelle hian lemchan chu a thiam lutuk lo. Mahse khatih laia Alexander-a hmel a hmuh khân tu pawh duh se, amah a nih ngai loh tûr thu a sawi kha a hrechhuak a, a meng dul raih a, rilru na tak hmel a pu a

A hmangaih lutuk a, mahse a tak tak ah chuan a lantîr ngam si lo va, hetia lem an chan takah chuan hrehna nei lem lo vin a role chanah chuan a inpe thlap. Script ang khân Alexander a hmai chu a hru a, ama irawm chhuak in a belh zeuh bawk. Isabelle chuan Alexander-a hmai chu a zut a, rilru na tak hian a phun sap a "Tinge min hmangaih ve theih loh?" a ti a

Alexander-a awma a bei lai chuan a mittui a rawn luang a, lem an chan chauhvin a pawh ve ngam a ni si a

A dinhmun dik tak a han ngaihtuah chhuah chuan a lung a chhe lehzual a, a mit a chhing tawp. A mittui a rawn luang char char a

An scene pawh an zo leh ta. Mahse an vaiin an ngawi ṭhap a, Director in "Cut" a tih hun an nghak a

Isabelle i'n Alexander a hmai a chul lai chuan a lo in seh run a, insumthei viau lo se chuan muhil angin a chang chhuak thei miah lo vang

Isabelle i'n lungkuai taka "Tinge min hmangaih theih loh?" a tih lai te chuan camera in a lak phak loh lam a kut chu a lo hum nasa mai. A awma a rawn bei lai te chuan a thin a lo phu dup dup a, a thawk a buai lo chauh a ni. A kawr a huh tih a hnuah a hria a

'A mittui em ni?' a ti rilru a

Alexander chu a insum thei ta ngang lo. Lungchhe taka Isabelle mittui luang chu a melh ran a

A hmel lan dan chu a tak a an êm avângin 'Isabelle hian a lo hmangaih ve reng em ni?' tih te a ngaihtuah a, 'A tak ang chiah a chan a thiam hle mai' te a ti rilru a

Alexander hrawk bâwk chu a che ralh a, a kut chu a rawn lek kang a, Isabelle mittui chu hruk sak a chak khawp mai

Chumi lai tak chuan Director in "Cut" a rawn ti a

Director aw a hriat rualin Isabelle chu Alexander hlatah a awm vat a, lungngai hmel pawh a pu tawh lo rêng rêng

Alexander a kut lek chhuak pawh a lai zo vek. Isabelle chu chiang em em in a melh a, a hmaa a hmel landan ang kha a lo ni leh tawh miah lo tih a hmu a

Isabelle chuan Alexander chu en pawh a en ngam lo ania, engtin nge a kut rawn lek pawh a hmuh tehlul ang? Alex lam a hawi veleh a lo en reng tih a hre chiah a, a thin a phu rang teh e, inthiamlo deuhvin "Khami scene ah khan min chawk phûr tu a awm a, a hmaa ka hrilh lawk loh che avângin min ngaidam dawn nia" a ti a

Chu thu a hriat chuan Alexander chuan a kut a hum ruh sauh a, a hma ang bawk khan engmah danglam a awm lo tih a hrethiam mai 

Thudik hian a suangtuah ram mai a ni tih a rawn hriat nawn tîr ṭhîn. Amah pawhin a suangtuahna mai mai a ni tih a hria. Mahse a finfiah apiang hian zak takin a awm phah ziah a ni. Alexander chuan hnual râwihin Isabelle, a bula la ṭhu reng chu a nam sawn dawrh a, ding deuh thut in a kal nal nal a

Alexander hi chu a film chan ah hian a rilru zawng zawng a pe ṭhîn a, chutiang bawkin chhuah leh pawh a awlsam bawk. A chanpui tawh te ho hian an hrechiang tawh hlawm lutuk. Scene an zawh veleh be tawh lovin a kal nghal daih ṭhîn

Director in "Cut" a tih hnu chuan camera pawh an off hmak a, mipuite chu an awmna a hlat êm avângin Alexander leh Isabelle inkara thil dik lo pawh chu rinhlelhna chang an hre lo

Director chuan an chan tawh te chu a han ennawn leh a, Alexander a chan dânah chuan sawisel tûr a hre lo. A hnuah Isabelle lam chu a hawi a, thiam a tih ve hmel takzet a ni

A rawn fak ve ta nge nge a "Miss Davis, i chang thiam lutuk ania. Tun hi Helen tih lovah chuan Alexander a chan pui tawh te zîngah chuan a thiam ber pawl chu i ni. Vawikhatna ah a fuh nghal thlup mai. I rawn belh zauh lai pawh kha a fuh lutuk ringawt"

Ama nihna a chang chhuak a ni mai a, engtin nge a tih chhiat theih rêng ang? Isabelle chuan a ngaihtuahna chu a sawi chhuak lem lo. Director hnêna lawmthu a sawi zawh chuan a makeup an rawn khawih ṭha a

Mipui Isabelle scene en duh vânga rawn pungkhawmte chuan an zah tawh in an ngaisang khawp mai. A hriatah an sawi chhuak hial a

"Mi thar mai a la ni chungin a thiam hle mai"

"Mr Smith a'n zanriah kil laia a lo fak pawh kha a awm hliah hliah mai"

"Isabelle hi a hmelṭha ringawt lo va, lemchan pawh a lo thiam hle a nih hi. Alexander nen Tv series ah an chang bawk a, a la thleng sang ngawt ang"

Annabelle pawhin Isabelle chu an fak nasat êm avângin a awmna lam a hawi ve a

Mi thar, a role râwn chhuhsak tu hi a thiam tak tak pawh a lo ring lo va, a hmel vâng chauhva he role hi changah a lo ngai a, Alexander nen an inhmeh hle ang tih tu nge ring pha ang?

Mipuite sawi ang chiah khân, hetianga zêla a kal chho a nih chuan a la thleng sang ngei ngei ang

Movie Industry ah hi chuan Annabelle hian Helen-i a khum thei miah lo va, kum tam tak a rûka a tawrh hnuah Helen i'n role a la tam tawh lo nen 'Best screen Actress' a nih ve theih mai a inring a, mahse Isabelle a rawn lang leh ta si a

Annabelle chu a hnual nghal rawih mai

'Best screen Actress' a nihna tûr kawng ah hian tumah a hmaah an ding tûr a ni lo

Thinrim zetin a pheikhawk sang zet bun in a pen ri thlerh thlerh a

CHHUNZAWM LEH TUR